Gjykata e Shkallës së Parë e Juridiksionit të Përgjithshëm Durrës, po përballet me vonesa të konsiderueshme në trajtimin e çështjeve civile, në lëshimin e urdhrave të ekzekutimit, madje edhe në çështjet penale. Kjo ka ardhur si rezultat i volumit të lartë të dosjeve dhe numrit të reduktuar të gjyqtarëve, pranë kësaj gjykate. Kryetari i Dhomës së Avokatisë Durrës, z. Lorval Petani, thekson se këto vonesa, së bashku me efektet e reformës në drejtësi, kanë dobësuar besimin e publikut tek sistemi gjyqësor, kanë vështirësuar administrimin e dosjeve, si dhe kanë krijuar sfida në marrëdhëniet me klientët. Ai nënvizon nevojën urgjente për masa përmirësuese dhe shpreh një vizion të qartë për një drejtësi më efikase, transparente, që rikthen besimin dhe garanton drejtësi për qytetarët.